Türkmen okuwçylary Moskwanyň döwlet halkara gatnaşyklary institutynda mugt bilim alyp bilerler
Türkmenistanly mekdep okuwçylary Moskwanyň döwlet halkara gatnaşyklary institutynda geçirilýän "MGIMO-nyň halkara mekdep olimpiadasy" atly daşary ýurtly okuwçylaryň arasynda geçirilýän ýaryşda gatnaşyp, bu abraýly ýokary okuw mekdebinde tölegsiz esasda bilim almaga mümkinçilik alyp bilerler. 10-11 synp mekdep okuwçylary bäsleşige gatnaşmak üçin şu salgy arkaly özlerini hasaba aldyryp bilerler.
Şu gezekki bäsleşige Azerbaýjandan, Ermenistandan, Belarusdan, Gyrgyzystandan, Gazagystandan, Täjigistandan, Türkmenistandan, Mongoliýadan, Hindistandan we Afrika döwletlerinden mekdep okuwçylarynyň gatnaşmagyna garaşylýar. Saýlama tapgyrda oňa gatnaşyjylar onlaýn tertipde test soraglaryna jogap berip, jemleýji tapgyrlarda şahsy gatnaşyk we onlaýn tertipde düzmeler ýazarlar.
Olimpiada gatnaşyjylar iňlis dilini, geografiýanyň, ählumumy taryhy we halkara gatnaşyklary ugurlary boýunça bilimlerini görkezerler. Ýeňijiler we baýraklar orunlara mynasyp bolanlar her ýurt üçin aýratyn kesgitlenen. Şunda bäsleşigiň ýeňijileri Moskwanyň döwlet halkara gatnaşyklary institutynda tölegsiz esasda, baýdakly orunlara mynasyp bolanlar bolsa, tölegli esasda bu ýokary okuw mekdebinde okamaga mümkinçilik alarlar.
ORIENT news
