Türkmenistan Ýakutiýada geçirilen ýaryşyň medallar sanawynda ikinji orny eýeledi
Türkmenistanly türgenler Ýakutiýanyň milli oýny – mas-restling boýunça geçirilen ýaryşyň umumy medallar sanawynda ikinji orny eýeledi. Bu barada Russiýanyň daşary syýasat edarasynyň Ýakutskdaky edarasy habar berýär.
Çeboksary şäherinde geçiirlen ýaryşa türkmen türgenlerinden daşary, Angoladan, Müsürden, Hindistandan, Indoneziýadan, Iordaniýadan, Yrakdan, Eýrandan, Marokkodan, Russiýadan, Siriýadan we Täjigistandan ussat türgenler gatnaşdylar.
90 kilogram agram derejesinde çykyş eden türkmen türgeni Isa Allaberdiýew ýaryşda öz ukyp-başarnyklaryny görkezip, kümüş medala eýe boldy. Ol müsürli Abdelhalim Abdalleden asgyn gelip, russiýaly garşydaşy Daniil Razumowany ýeňmegi başardy. Umumy medal sanawynda birinji orny russiýaly, üçünji orny hem müsürli türgenler eýelediler.
Mas-restling – bu iki türgeniň arasynda agaç pürs goýlup, birek-biregi özüne çekmek bilen ýaryşylýan ýakut halkynyň milli oýnudyr. Bu oýun türgenlerden ýokary beden taýýarlygyny we gujur-gaýraty talap edýär.
ORIENT news
