Türkmen boksçysy Hançžou şäherinde Aziýa oýunlarynda bürünç medal gazandy
Türkmen boksçysy Baýramdurdy Nurmuhammedow Hytaýyň Hançžou şäherinde geçirilýän XIX Aziýa oýunlarynda bürünç medal aldy.
Türkmenistanyň Boks federasiýasynda ORIENT-iň habarçysyna habar berilşi ýaly, türgen 71 kilograma çenli agram derejesinde bürünç baýrak aldy.
Deslapky tapgyrda Nurmuhammedow Täjigistanyň wekili Dawud Mahkamowy ýeňdi.
Ýaryşyň indiki tapgyrynda türkmen boksçysy Palestinaly Nidal Fokahaany ýeňdi we ýaryşyň ýarym finalyna çykmak ugrundaky göreşde mongol Tuguldur Býambatsogty ýeňdi. Türkmen boksçysy Taýwanyň wekili Kan Çia Weýu ýeňilip finaldan bir ädim uzaklykda galdy. Şeýlelikde, Nurmuhammedow ýaryşyň bürünç medalyna eýe boldy.
Ozal dzýudoçy Maýsa Pardaýewa we göreşçiler Işanmyrat Ataýew we Aýnur Amanowa bürünç medallara eýe boldular. Göreş boýunça ýene bir ussat Tejen Tejenow türkmen toparyna kümüş medal getirdi.
Aziýa oýunlarynyň 23-nji sentýabrdan 8-nji oktýabr aralygynda geçirilýändigini ýatladýarys. Hançžou şäherinde XIX Aziýa tomusky oýunlary ilkibaşda 2022-nji ýylyň 10-25-nji sentýabry aralygynda geçirmek meýilleşdirilýärdi, ýöne Covid-19 pandemiýasy sebäpli ýaryş 2023-nji ýyla yza süýşürildi.
Umuman, oýunlara Aziýanyň 45 ýurdundan 15 müňden gowrak türgenler gatnaşýar. Oýunlarda sportyň 40 görnüşinde 481 medal üçin ýaryşýarlar.
Türkmen türgenleri sportyň 3x3 basketbol, boks, erkin usulda we grek-rim göreşi, jiu-jitsu, dzýudo, göreş, karate, ýeňil atletika, suwda ýüzmek, agyr atletika we uşu ýaly görnüşlerinde ýurda wekilçilik edýärler.
ORIENT news
