Türkmen türgeni Hançžou şäherinde geçirilen Aziýa oýunlarynda bürünç medala eýe boldy
Erkin göreş boýunça türkmen türgeni Döwletmyrat Orazgylyjow Hytaýyň Hançžou şäherinde geçirilen XIX Aziýa oýunlarynda bürünç medala eýe boldy. Ildeşimiz bu medaly 86 kilogram agram derejesinde çykyş edip gazandy.
Döwletmyrat Orazgylyjow ilkinji duşuşygyny singapurly Weng Çowa garşy geçirip, ýeňmegi başardy. Ikinji duşuşygynda ildeşimiz eýranly Hasan Ýazdaniçaratiden asgyn gelip, üçünji we dördünji duşuşygynda kyrgyz türgeni Muhammad Abdullaýewany we mongoliýaly Býambasureni ýeňip, bürünç medaly gazandy.
Mundan ozal, Aziýa oýunlarynda bürünç medallara ildeşlerimiz dzýudoçy Maýsa Perdžýewa, boksçy Baýramdurdy Nurmuhammedow, kuraş sportunyň ussatlary Işanmyrat Ataýew we Aýnur Amanowa mynasyp boldular. Kuraş sporty boýunça başga bir türgenimiz Tejen Tejenow Oýunlaryň kümüş medalyny gazandy.
XIX Aziýa oýunlary Hytaýyň Hançžou şäherinde 23-nji sentýabr – 8-nji oktýabr aralygynda geçirildi. Oňa Aziýa ýurtlaryndan 15 müňden gowrak türgen gatnaşdy.
ORIENT news
