Halkara sergiler býurosy: Türkmenistanda geljekde EXPO-nyň ýöriteleşdirilen sergisi guralyp bilner
Halkara sergiler býurosynyň Baş sekretary Dimitri Kerkentzesiň Aşgabada saparynyň çäklerinde Söwda-senagat edarasynyň başlygy Mergen Gurdow bilen geçirilen duşuşykda geljekde Türkmenistanyň çäginde EXPO-nyň ýöriteleşdirilen sergisini guramak mümkinçilikleri ara alnyp maslahatlaşyldy.
Duşuşykda taraplar Katar Döwletiniň paýtagtynda “Expo 2023 Doha” sergisiniň we onuň çäklerindäki Türkmenstanyň pawilýonynyň açylmagy bilen birek-biregi tüýs ýürekden gutladylar. Kerkentzesiň szölerine görä, Türkmenistanyň pawilýony özüniň gaýtalanmajak bezeg aýratynlygy bilen tapawutlanýar.
Halkara sergiler býurosynyň Baş sekretary Türkmenistanyň Söwda-senagat edarasynyň başlygy Mergen Gurdowy halkara býuronyň Baş aasambleýasynyň noýabr aýynda geçiriljek nobatdaky mejlisine gatnaşmaga çagyrdy. Türkmenistanyň Söwda-senagat edarasynyň we Halkara sergiler býurosynyň arasynda hyzmatdaşlygy ösdürmegiň möhüm meseleleri ara alnyp maslahatlaşyldy.
Şu gün – 9-njy oktýabrda Doha şäherinde geçirilýän halkara serginiň çäklerinde Türkmenistanyň milli güni bolar. “Ýaşyl sähra, iň amatly daşky gurşaw” ady bilen geçirilýän sergi 2-nji oktýabrda açylyp, ol 2024-nji ýylyň 28-nji martyna çenli dowam eder. Bagçylyk boýunça indiki sergi bolsa, 2027-nji ýylda Ýokohama şäherinde “Bagtyýarlyk üçin geljekki tebigat peýzažy” ady bilen geçiriler.
“Ähli adamzat üçin güýmenje: hemmeler üçin sport we saz” ady bilen 2027-nji ýylyň 15-nji maýy – 15-nji awgusty aralygynda guralmagy meýilleşdirilen ýöriteleşdirilen Expo sergisiniň geçiriljek ýeri hökmünde Serbiýa Respublikasynyň paýtagty Belgrad şäheri hödürlenildi. 5 ýylda bir gezek, 3 aýlap geçirilýän ýöriteleşdirilen sergi aýratyn bir mowzukda ählumumy çäreleri öz içine alýar.
Öz gezeginde, Türkmenistan “Expo 2025 Osaka Kansai” Bütindünýä sergisine gatnaşmaga taýýarlyk görýär. Ondan soňky “Expo -2030” Bütindünýä sergisini geçirmäge Koreýa Respublikasy (Pusan) we Saud Arabystany (Er-Riýad) dalaş edýärler.
ORIENT news
