Serdar Berdimuhamedow telefon arkaly Putini doglan güni bilen gutlady
TDH agentliginiň berýän habaryna görä, Türkmenistanyň Prezidenti Serdar Berdimuhamedow Russiýa Federasiýasynyň Prezidenti Wladimir Putin bilen telefon arkaly söhbetdeşlik geçirdi.
Türkmen Lideri rus kärdeşini doglan güni bilen gutlady we oňa jan-saglyk, bagt, abadançylyk we ýokary Hökümet wezipesinde üstünlikler arzuw etdi. Şeýle hem, deňlik, birek-birege hormat goýmak we hoşniýetli goňşuçylyk ýörelgelerine esaslanýan türkmen-rus gatnaşyklarynyň ösmegine berlen şahsy ünsi we goldawy üçin minnetdarlyk bildirdi.
“Russiýa Federasiýasy Türkmenistanyň strategiki hyzmatdaşydyr. Gatnaşyklarymyz deňlik, birek-birege hormat goýmak we hoşniýetlilik ýörelgelerine esaslanýar” -diýip, Serdar Berdimuhamedow belledi. Söhbetdeşlikde bellenip geçilişi ýaly, häzirki wagtda iki ýurt hem dürli ugurlarda üstünlikli hyzmatdaşlyk edýär.
Ikitaraplaýyn söwda-ykdysady gatnaşyklar oňat netijeleri görkezýär, pudaklaryň arasyndaky täsirli aragatnaşyk ýola goýuldy we parlamentara gatnaşlyklar ösdürildi.
Medeni, ylym-bilim ugurlaryndaky hyzmatdaşlyk üstünlikli ösdirilýär, bu bolsa, iki döwletiň halklaryny ýakynlaşdyrmakda esasy faktorlaryň biridir.
Gutlaglar üçin minnetdarlyk bildirip, Putin türkmen halkynyň Milli Lideri, Halk Maslahatynyň Başlygy Gurbanguly Berdimuhamedowa iň gowy arzuwlaryny ýetirdi we onuň döwletara hyzmatdaşlygyny ösdürmekde we giňeltmekde uly goşant goşandygyny belledi.
7-nji oktýabrda Russiýanyň Prezidenti Wladimir Putin doglan gününi belleýär. Şu gün döwlet Baştutany 71 ýaşady.
ORIENT news
