Türkmenistanyň Prezidenti Wenesiýadaky pajygaly waka bilen baglanyşykly Italiýa gynanç bildirdi
Türkmenistanyň Prezidenti Serdar Berdimuhamedow Wenesiýa şäheriniň ýakynynda köp sanly adam pidalaryna we şikes ýetmelere getiren awtobus heläkçiligi zerarly Italiýa Respublikasynyň Prezidenti Serjio Mattarella gynanç hatyny iberdi.
Döwlet Baştutanymyz şu agyr pursatda gurban bolanlaryň dogan- garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan ýürekden gynanjyny, medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdi diýip milli habarlar gullugynyň agşamky ýaýlymynda aýdyldy.
Wenesiýada, Mestre we Margera etraplaryny birleşdirýän demir ýollaryň golaýynda syýahatçylary alyp barýan awtobus esrakadan gaçdy we ot aldy. Sişenbe güni, 3-nji oktýabrda Italiýanyň Corriere della Sera gazetiniň, agşam habar berşi ýaly, bu ýol heläkçiliginde azyndan 21 adam, şol sanda üç çaga öldi. Şikes ýeten 15 adamyň dördüsi çaga, bäş adamyň ýagdaýy agyr.
Ýol heläkçiliginiň pidalarynyň hatyrasyna Wenesiýada matam yglan edildi.
ORIENT news
