Arkadag şäheriniň 74 çowlukly iň ýaşuly ýaşaýjysy mälim edildi
89 ýaşly Şamyrat Nazarow Arkadag şäheriniň iň ýaşuly ýaşaýjysydyr. Ilkinji “akylly” şäheriň ýaşuly ýaşaýjysy şu töwerekde 1934-nji ýylyň 22-nji awgustynda doglupdyr. Häzrki wagtda onuň 4 ogly, 6 gyzy, 43 agtygy, 74 sany hem çowlugy bar diýlip, “Arkadag” gazetinde habar berilýär.
Ýaşulynyň sözlerine görä, Babarap we Gorjaw ýerleriniň derde derman howasy bar. Munuň şeýledigine Şamyrat aga ýaş wagty harby gullukdan näsaglap gelen wagty göz ýetiripdir. Bu ýerleriň howasy, suwy we ir-iýmişi Şamyrat agany aýaga galdyrypdyr.
Döwlet ähmiýetli şäheriň gazetine beren söhbetdeşliginde ýaşuly bu ýerde gurnalan ýaşaýyş-durmuş we ulag şertlerine ýokary baha berdi. Bu şäherde onuň körpe ogly we agtyklary hem ýaşaýar.
Arkadag şäheri ekologiýa taýdan iň arassa tehnologiýa şäheri hökmünde halkara guramalarynyň we kompaniýalarynyň birnäçesiniň şahadatnamalaryna eýe boldy.
ORIENT news
