Türkmen ekerançylary banan ýygymyna girişýärler
“Ferhar” hojalyk jemgyýeti noýabr – dekabr aýlarynda ösdürilip ýetişdirilen bananyň bol hasylyny ýygmagy meýilleşdirýär. Bu tropiki miwe Mary welaýatynda ýerleşýän ýyladyşhanada ösdürilip ýetişidirilýär diýip, Türkmenistanyň Senagatçylar we telekeçiler birleşmesiniň neşiri habar berýär.
Ýyladyşhanada 2 müň düýp töweregi banan ösdürilip, olaryň käbiriniň boýy 3 metre ýetýär. Agrotehniki kadalara berk eýerip, ideg edilende bu tropiki ekinden bol hasyl alyp bolýar. Banan üçin nahallar hem bu hojlyk jemgyýetinde ýetişdirilýär.
“Ferhar” hojalyk jemgyýetiniň hünärmenleri ýene-de bir topiki ekini – papaýany ösdürip ýetişdirmäge girişdiler. Häzirki wagtda bu ýerde papaýanyň 70-den gowrak düýbi ösdürilip ýetişdirilýär.
Maryly ekerançylar başga tropiki miweleri hem ösdürýärler. Hojalyk jemgyýetiniň 15 gektara uzaýan bagynda smorodinanyň we tokaý miweleriniň dürli görnüşleri ösdürilip ýetişdirilýär.
ORIENT news
