Türkmenistan bilen Germaniýanyň arasyndaky haryt dolanyşygy 2023-nji ýylda 69% ýokarlandy
Türkmenistan bilen Germaniýanyň arasyndaky haryt dolanyşygy 2023-nji ýylyň ýedi aýynda, geçen ýylyň degişli döwri bilen deňeşdirilende 69,4% ýokarlandy we 185,5 million ABŞ dollaryna barabar boldy. Türkmenistanyň daşary söwdasynyň umumy göwrüminde Germaniýa 11-nji ýerde durýar. Şeýle görkezijiler 29-njy sentýabrda Berlinde geçirilen türkmen-german işewür forumynda yglan edildi.
Türkmenistan Germaniýadan esasan tehnika we enjamlary, elektrik harytlary, ulag serişdelerini, senagat-tehniki we öý harytlaryny import edýär we GFR-na pomidor we beýleki miweler, gök önümler, haly we dokma we ş.m. bilen eksportynyň gerimini giňeltmegi teklip edýär.
Bu, iki ýurduň işewür toparlarynyň wekilleriniň arasynda geçirilen işewürlik forumynyň çäginde geçirilen gepleşiklerde ara alnyp maslahatlaşyldy. Geljegi uly hyzmatdaşlygyň köp ugurlarynyň arasynda öňdebaryjy nemes tehnologiýalarynyň çekilmegi hem agzaldy.
Şeýle tehnologiýalar we enjamlar eýýäm Türkmenistanyň köp pudaklarynda, şol sanda lukmançylyk edaralarynda, pagta egriji we dokma fabriklerinde, boýag önümçiliginde we azyk senagatynda işleýär.
Nemes kompaniýalarynyň täze çözgütlerini we enjamlaryny ulanmak maksady bilen bu mümkinçilikleri giňeltmekden başga-da, türkmen tarapy energetika, himiýa senagaty, dökün öndürmäk bilen peýdaly magdanlaryň känlerini özleşdirmek, gurluşyk materiallary öndürmek boýunça, şeýle hem ulag infrastrukturasyny ösdürmekde, syýahatçylyk pudagynda bilelikdäki taslamalary durmuşa geçirmäge gyzyklanma bildirdi.
Geljegi uly hyzmatdaşlykda ýaşyl ykdysadyýete geçiş, energiýa tygşytlamak, suw tygşytlamak, alternatiw energiýa çeşmelerini üpjün etmek we sanlaşdyrmak talaplaryna laýyk gelýän önümçilik desgalaryny döretmek, şeýle hem bu ugurlarda hünärmenleri taýýarlamak hasaplandy.
Bu nukdaýnazardan, iki ýurduň Söwda-senagat palatalarynyň arasynda özara gatnaşygy işjeňleşdirmek, şol sanda işewür maglumatlary alyşmak bilen önümçilik pudagynda hyzmatdaş gözlemek, bilelikdäki kärhanalary döretmek, işewürlik forumlary, söwda we ykdysady missiýalary, sergileri we ýarmarkalary guramak teklip edildi. Hususan-da, 2024-nji ýylda Türkmenistanda nemes öndürijileriniň önümleriniň sergisini guramak teklip edildi.
ORIENT news
