Trans-Hazar gaz geçirijisi, wodorod we metanyň zyňyndylaryny azaltmak - Berlin duşuşyklarynyň mowzuklary
Anna güni, Türkmenistanyň Halk Maslahatynyň Başlygy Gurbanguly Berdimuhamedow Berline iş saparynyň çäginde Germaniýanyň kansleriniň orunbasary, Federal ykdysadyýet we howany goramak ministri Robert Habek bilen duşuşdy.
Ikitaraplaýyn hyzmatdaşlygyň geljegi barada geçirilen söhbetdeşlikde Türkmenistanyň bar bolan nebit, gaz we himiýa toplumlarynyň döwrebaplaşdyryş we täze desgalary gurmak taslamalaryna gatnaşmak, Hazarda uglewodorod çeşmelerini özleşdirmek we trans-Hazar gaz geçirijisiniň gurluşygy üçin mümkinçilikler açylýan energetika esasy ugurlaryň biri diýlip atlandyryldy diýip, TDH agentligi ýazýar.
Wodorod energetikasy we metanyň zyňyndylaryny azaltmak pudagyndaky hyzmatdaşlygyň mümkinçiligine aýratyn üns berilýär. Bu nukdaýnazardan Türkmenistanyň bilelikde işlemäge taýýardygy tassyklandy we döwlet edaralarynyň we iri kompaniýalaryň gatnaşmagynda energetika hyzmatdaşlygy meýilnamasyny düzmek teklip edildi.
Şeýle hem häzirki wagtda aktual ugurlaryň biri ulag diýlip, hususan-da Merkezi Aziýa-Ýewropa kontinental üstaşyr geçelgeleriň döredilmegi we howa, ýerüsti hem-de deňiz böleklerini öz içine alýan aragatnaşygyň multimodal ulgamynyň ösüşi atlandyryldy.
Ulag infrastrukturasyny döwrebaplaşdyrmak, Türkmenistanda ulaglaryň bilelikdäki önümçiligini döretmek we orta möhletli hyzmatdaşlygyň Ýol kartasyny işläp taýýarlamak baradaky taslamalar ara alyp maslahatlaşmagyň mowzugy boldy.
Maliýe, bank we maýa goýum pudaklary, aragatnaşyk, oba hojalygy we suw dolandyryşy we sanlylaşdyrma özara gatnaşyklaryň geljegi uly ugurlary hökmünde kesgitlenildi.
Ekologiýa pikir alyşmagyň aýratyn mowzugyna öwrüldi. Bellenilişi ýaly, Germaniýa ýaşyl tehnologiýalar we global howanyň gün tertibini öňe sürmek boýunça dünýä liderlerinden biridir.
Bu mowzuklar şu gün Berlinde geçirilen «Merkezi Aziýa - Germaniýa» sammitiniň, şol sanda Merkezi Aziýa sebitiniň wekiliýetleriniň we Germaniýanyň Gündogar ykdysady komitetiniň ýolbaşçylarynyň duşuşygynda gozgaldy.
ORIENT news
