Türkmenistanyň Baýdagy dünýäniň iň belent binasynda şöhlelendirildi
Garaşsyzlygyň 32 ýyllygy mynasybetli Türkmenistanyň Döwlet baýdagy dünýäniň iň belent "Burj Halifa" binasynda şöhlelendirildi. Bu bina Birleşen Arap Emirlikleriniň Dubaý şäherinde ýerleşýär.
Türkmenistanyň Dubaý şäherindäki konsullygy dünýäniň iň belent binasynyň ýüzünde Türkmenistanyň ýaşyl tugy, onuň gözel nagyşlaryny janlandyrýan pursadyny görkezýän wideoýazgyny özüniň "Instagram" hasabynda paýlaşdy.
"Burj Halifa" binasynda türkmen Tugynyň şekillendirilmegi türkmen-emirlik dostluk gatnaşyklarynyň aýdyň nyşanydyr. Türkmenistanyň öňden gelýän ýakyn hyzmatdaşy bolup durýan Birleşen Arap Emirlikleri bilen söwda-ykdysady we işewürlik gatnaşyklary yzygiderli ösdürilýär.
Emirlikleriň işewürliginiň geljegi uly türkmen bazarynda eýeleýän ornuny pugtalandyrmaga gyzyklanmalary artýar. Bu bolsa Prezident Serdar Berdimuhamedowyň alyp barýan maýa goýum syýasaty, ýurdumyzy senagatlaşdyrmagy hem-de öňdebaryjy tehnologiýalary, işläp taýýarlamalary ornaşdyrmagyň esasynda diwersifikasiýalaşdyrylan häzirki zaman senagat düzümini kemala getirmegi maksat edinýän toplumlaýyn özgertmeler maksatnamalary we taslamalar bilen berk baglanyşyklydyr.
ORIENT news
