Türkmen boksçysy Aziýa oýunlarynda ilkinji ýeňşini gazandy
Hytaýyň Hançžou şäherinde geçirilýän XIX Tomusky Aziýa oýunlarynda türkmen boksçysy Baýramdurdy Nurmuhammedow ilkinji ýeňşini baýram etdi. Bu barada Türkmenistanyň boks federasiýasy “ORIENT-e” habar berdi.
Baýramdurdy Nurmuhammedow 71 kilogram agram derejesinde çykyş edýär. Onuň bu agram derejesinde jemi 23 türgen medallar ugrunda güýç synanyşýarlar. Türkmen türgeni geçen ýylda dünýä çempionatyna gatnaşan täjigistanly garşydaşy Dawut Mahkamow bilen duşuşdy we ony ýokary görkezijide – 5:0 hasabynda ýeňmegi başardy.
Ildeşimiz indiki duşuşygyny palestinaly Nidal Fokahaa bilen duşuşar. Ol geçen ýyl Daşkent şäherinde geçirilen dünýä çempionatynda 9-njy orny eýeläpdi.
Türkmen döwlet bedenterbiýe we sport institutynyň talyby Baýramdurdy Nurmuhammedow boks boýunça milli we halkara ýaryşlaryň ýeňijisidir.
ORIENT news
