Ankaradaky iň beýik binalardan birini Türkmenistanyň baýdagynyň reňkine boýadylar
27-nji sentýabrda Türkmenistanyň Garaşsyzlyk güni mynasybetli, Ankaranyň merkezinde ýerleşýän Söwda-senagat palatalary we birža birleşiginiň beýik binasy yşyklandyrma arkaly Türkmenistanyň milli baýdagynyň reňkine bolady.
Bu dostlukly hereket, Türkmenistan bilen Türkiýe Respublikasynyň arasyndaky hyzmatdaşlygyň we doganlyk gatnaşyklarynyň ýokary derejesini görkezdi.
140 metr beýiklikdäki Türkiýäniň Söwda-senagat palatalary we birža birleşigi Ankaradaky iň beýik binalaryň biri we Türkiýäniň söwda merkezidir.
Ýakynda habar berşimiz ýaly Türkmenistanyň Garaşsyzlyk güni Kapadokiýada birnäçe çäreler bilen bellendi.
Türkmen ilçihanasynyň maglumatyna görä, Türkmenistanyň Garaşsyzlygynyň 32 ýyllygyna we Gündogaryň beýik akyldary we nusgawy şahyry Magtymgulynyň 300 ýyllygyna bagyşlanan çäreleriň birnäçesi Türkiýe Respublikasynyň Newşehir şäherinde geçirildi.
Şeýle hem, bu ýerde Türkmenistanyň Türkiýedäki ilçisi Mekan Işangulýew bilen Kapadika uniwersitetiniň rektory Hasan Ali Karasaryň arasynda duşuşyk geçirildi. Onda bu uniwersitetiň Türkmenistanyň ýaşlarynyň hünär bilimini almak üçin mümkinçilikleri görkezildi.
Duşuşykdan soň Türkmenistanyň Garaşsyzlygynyň 32 ýyllygyna we Magtymgulynyň 300 ýyllygyna bagyşlanan serginiň açylyş dabarasy boldy we bu mowzukda ylmy maslahat geçirildi.
ORIENT news
