Türkmen uniwersiteti “Times Higher Education-2024” dünýä reýtingine girdi
Halkara ynsanperwer ylymlary we ösüş uniwersiteti “Times Higher Education” guramasynyň geljek ýyl üçin düzen “The Impact Rankings 2024” jemleýji reýtinginiň sanawyna girdi.
Ýokary okuw mekdepleriniň reýtingini düzýän bu halkara gurama dünýäde iň abraýly baha beriş düzümleriň biridir. Ol ilkinji nobatda ýokary okuw mekdeplerinde Durnukly ösüş maksatlarynyň ýerine ýetirilişine baha berýär.
“ORIENT-e” habar berlişi ýaly, Halkara ynsanperwer ylymlary we ösüş uniwersiteti bu guramada “habarçy” derejäni aldy we geljek ýyl üçin ählumumy sanawa girizildi. Onda esasan ýokary okuw mekdeplerinde okatmak, ylmy işleri alyp barmak, dolandyrmak we maglumat ýaýradyş işleriniň alnyp barlyşyna baha berildi. Bu sanaw 2018-nji ýyldan bäri düzülýär we gysga wagtda uly meşhurlyga eýe boldy. Sebäbi, bu gurama goşulýan okuw mekdepleriniň sany her ýyl artýar.
Guramanyň her ýylda çap edilýän žurnalynda iň öňdebaryjy ýokary okuw mekdepleri mälim edilip, olaryň iň gowy tejribeleri paýlaşylýar. Guramanyň geljek ýyl üçin sanawynda Oksford uniwersiteti birinji orunda ýerleşdirildi.
ORIENT news
