Wladimir Putin: Türkmenistanyň Bitaraplyk syýasaty Merkezi Aziýa sebitinde howpsuzlygy, durnuklylygy berkitmegiň möhüm şerti
Russiýa Federasiýasynyň Prezidenti Wladimir Putin Türkmenistanyň Garaşsyzlyk güni mynasybetli Prezident Serdar Berdimuhamedowa gutlag hatyny iberdi. Bu barada Döwlet habarlar agentligi mälim edýär.
Hatda şeýle bellenýär: "Siziň ýurduňyzyň ykdysady we durmuş ulgamlarynda gazanýan üstünlikleri hemmelere mälimdir. Türkmenistanyň alyp barýan oňyn Bitaraplyk syýasaty Merkezi Aziýa we Hazar sebitinde howpsuzlygy, durnuklylygy berkitmegiň möhüm şerti bolup durýar".
Wladimir Putiniň belleýşi ýaly, Russiýa Türkmenistan bilen strategik hyzmatdaşlygy çuňlaşdyrmaga uly ähmiýet berýär. Bilelikde ähli ugurlarda netijeli ikitaraplaýyn gatnaşyklary, halkara giňişlikdäki hyzmatdaşlygy dostlukly halklaryň bähbitlerine mundan beýläk-de ösdüriljekdigine ynam bildirilýär.
Mümkinçilikden peýdalanyp, Russiýanyň Prezidenti Prezident Serdar Berdimuhamedowa berk jan saglyk we üstünlik, Türkmenistanyň ähli raýatlaryna bolsa bagtyýarlyk hem-de rowaçlyk arzuw etdi.
ORIENT news
