Türkmenistanyň tennis boýunça erkekler we ýaşlar ýygyndylary Daşkendäki türgenleşige gitdiler
Türkmenistan tennis boýunça erkekler topary, şeýle hem 14 ýaşa çenli ýetginjekler ýygyndysy özbegistanly türgenler bilen bilelikde üç hepdelik türgenleşik geçirmek maksady bilen Özbegistanyň paýtagty Daşkende gitdiler, bu barada ýurdumyzyň sportuň bu görnüşi baradaky Federasiýasynyň metbugat gullugy habar berýär.
Esasy türgenleşikler, tennis boýunça dünýäniň 16-njy raketasy - Iroda Tulýaganowanyň adyny göterýän dünýä belli Tennis akademiýasynda bolar.
Türgenleşik okuwlary gutarandan soňra, erkekler topary Türkiýäniň Antalýa şäherinde geçiriljek Dewis kubogyna gatnaşarlar. Bu ýyl Türkmenistan milli ýygyndysy Aziýa we Okeaniýa ýurtlarynyň dördünji toparynda bäsleşýärler. Bäsleşikde Singapur, Kuweýt, BAE, Yrak, Guam, Gyrgyzystan we Siriýanyň toparlary bilen bäsleşýärler.
Topardaky esasy kapitany Mirali Gasanow bolup, Ýuriý Rogusskiý, Meýlis Orazmuhammedow, Atlymyrat Gurbanow, Hajymyrat Çaryýew, Gurbanberdi Gurbanberdiýew we Allanur Daýanjow ýaly oýunçylary ýaryşa taýýarlar.
14 ýaşa çenli ýetginjekler toparynyň halkara ýaryşlaryna hem gatnaşjakdygyny bellemelidiris. Olar Buhara we Karşi şäherlerinde geçiriljek Aziýa federasiýasynyň iki açyk çempionatyna gatnaşarlar. Bu ýaryşlarda ýaş türkmen tennisçilerinden şular wekilçilik ederler: Ilima Guseýnowa, Imran Ahundow, Selim Çagylow, Sabrina Rahmanowa, Aýlara Kakabaýewa, Resul Mämmetgurbanow we Süleýman Hudaýberdiýew. Olar Andreý Dowmatowyň we Ýewgeniý Molçanowyň ýolbaşçylygynda türgenleşerler.
ORIENT news
