Aşgabatda Bütindünýä gümrük guramasynyň baş sekretary bilen gepleşikler geçirildi
26-njy sentýabrda Türkmenistanyň daşary işler ministri Raşid Meredow Aşgabada sapar bilen gelen Bütindünýä gümrük guramasynyň (WCO) Baş sekretary Kunio Mikuriýa bilen gepleşik geçirdi. Bu barada Türkmenistanyň Daşary işler ministrliginiň metbugat gullugy habar berýär.
Bütindünýä gümrük guramasy bilen hyzmatdaşlyk, gümrük işini gowulandyrmak nukdaýnazaryndan Türkmenistan üçin hyzmatdaşlygyň möhüm ugurlary, harytlaryň serhetüsti hereketiniň howpsuzlygyny üpjün etmek, sebit we halkara söwdanyň ösüşi bolup durýar diýip, Raşid Meredow belledi.
Türkmenistan ulag infrastrukturasynyň ösmegine, şeýle hem ýurduň ulag we logistika mümkinçiliklerine uly ähmiýet berýär. Şunuň bilen baglylykda, ýurtda täze logistika we tranzit merkezleri we gümrük desgalary döredildi we gümrük hyzmatlarynyň maddy-tehniki binýady yzygiderli berkidilýär diýip duşuşykda nygtaldy.
Taraplar Türkmenistan bilen Bütindünýä gümrük guramasynyň arasyndaky hyzmatdaşlygyň häzirki gün tertibini we mundan beýläkki hyzmatdaşlygyň geljegini ara alyp maslahatlaşdylar. Gepleşikler, Bütindünýä söwda guramasy tarapyndan gurnalan halkara we sebitleýin ýygnaklaryň, konferensiýalaryň we geňeşmeleriň çäginde taraplaryň üstünlikli gatnaşygyny bellediler.
Duşuşykda halkara gümrük işleri bilen baglanyşykly hukuk binýadyny giňeltmek we berkitmek boýunça hyzmatdaşlygy güýçlendirmek barada hem ylalaşyldy.
ORIENT news
