Mekdep okuwçylarynyň arasynda robototehnika bäsleşigi geçiriler
23-24-nji sentýabrda Türkmenistanyň Bilim ministrligi BMG-niň Çagalar Gaznasy bilen bilelikde türkmenistanly mekdep okuwçylaryň arasynda robototehnika bäsleşigini geçirer.
Aşgabat şäheriniň Büzmeýin etrabynda ýerleşýän 97-nji mekdepde geçiriljek bäsleşikde okuwçylar özleriniň taýýarlan robot tehnikalaryny we ylmy taslamalaryny görkezerler.
Bäsleşige gatnaşjak robot tehnikalary şu ugurlar boýunça kesgitlener:
• Robot Race – robot ýaryşy;
• «Manual Sumo» - bu bäsleşikde el dolanyşygynda robotlar özara güýç synanyşýar;
• «Auto Sumo» - awtomatik dolandyryşda robotlar özara güýç synanyşýarlar;
• «Mars Rover» - robotlaryň päsgelçiliklerden geçmek bäsleşigi;
• «Line Follower» - robotlaryň ýokary takyklykda, çyzgy boýunça hereket edip bilmegi;
• Ylym, tehnologiýa, inženerçilik we matematika ugurlary okuw maksatnamasynyň (STEM) çäklerinde ylmy taslamalar.
Bäsleşigiň ýeňijilerine şahadatnamalar we ýadygärlik sowgatlar gowşurylar.
ORIENT news
