Polşanyň Prezidenti katolik ybadathananyň Türkmenistandaky wekilhanasynyň ýolbaşçysyny sylaglady
Watikanyň Türkmenistandaky ilçihanasynyň attaşesi, polşaly Anjeý Madeý Polşanyň döwlet sylagy - "Altyn Haç" sylagy bilen sylaglandy. Bu çözgüdi ýurduň Prezidenti Anjeý Duda kabul etdi.
1923-nji ýylda esaslandyrylan bu sylag döwletiň öňünde bitirilen ýokary hyzmat üçin berilýär. Anjeý Madeý eýýäm 25 ýyl bäri Türkmenistandaky ilçihanada işleýär. "ORIENT" bilen bolan söhbetdeşliginde Anjeý Madeý şeýle gürrüň berdi: "Biziň gözümiziň alnynda türkmen paýtagtynyň täze keşbi kemala geldi. Men käteler şähere aýlanamda "Bu haýsy ýer?" diýen soragy berenimi bilmän galýan. Bu ýerde özgerişlikler şeýle çalt depginde bolup geçýär. Şonuň üçin-de, şäheriň ýaşaýjylary paýtagta "Ak şäherim" diýip söýgi bilen aýdýarlar. Gudraty Güýçliniň nazary düşmezden, gysga wagtda şeýle ajaýyp şäheri gurmak mümkin däl. Men Türkmenistanda Mukaddes tagtyň - Watikanyň adyndan wekilçilik edýän. Men her günde türkmen halkynyň şu gününiň we ertiriniň has-da ýagty bolmagyny Beýik Birribardan dileýärin. Goý. Türkmenistanyň ajaýyp geljegi bolsun we ösüşiniň bady hiç wagt peselmesin".
Katolik ybadathanasy Türkmenistanda 2010-njy ýylda resmi ykrar edildi. Häzirki wagtda bu ybadathananyň 3 ruhanysy we 200-den gowrak agzaly jemgyýeti bar.
Ýurdumyzda din we dini guramalaryň azatlygy kanun taýdan berkidilendir. Dünýewi döwletde halkymyz beýleki dinleriň wekilleri bilen agzybirlikde ýaşap, birek-birege hormat goýýarlar.
Ýeri gelende bellesek, Anjeý Madeý başga-da birnäçe sylaglaryň eýesidir.
ORIENT news
