Türkmenistanyň Ýüpek ýolunyň ugrundaky ýadygärlikleri ÝUNESKO-nyň sanawyna girizildi
Türkmenistanyň, Özbegistanyň we Täjigistanyň “Ýüpek ýoly: Zerewşan – Garagum geçelgesi” atly özünde 31 sany taryhy ýadygärligi jemleýän hödürnama toplumy ÝUNESKO-nyň Bütindünýä mirasynyň sanawyna girizildi.
Bu çözgüt ÝUNESKO-nyň Bütindünýä mirasy baradaky komitetiniň Er-Riýad şäherinde geçirilen giňeldilen 45-nji mejlisinde kabul edildi. Oňa Türkmenistanyň ÝUNESKO-nyň banyndaky hemişelik wekili Maksat Çaryýewiň ýolbaşçylygyndaky wekiliýet hem gatnaşdy.
ÝUNESKO-nyň web-saýtynda mälim edilişi ýaly, Merkezi Aziýadaky Zerewşan – Garagum geçelgesi Ýüpek ýolunyň esasy bölegi bolup, ol ähli ugurlary baglanyşdyrýan merkezdir.
Bu bölek arkaly II asyrdan XVI asyra çenli Günbatar bilen Gündogaryň arasynda uly möçberde haryt daşalypdyr. Bu ýol etniki toparlaryň, medeniýetleriň, ylmyň we tehnologiýanyň birleşýän merkezi bolupdyr.
Zerewşan – Garagum geçelgesiniň ugrunda orta asyr şäherleri, binagärlik we sungat ýadygärlikleri tapyldy. Bular öz gezeginde Merkezi Aziýada dürli medeniýetleriň garyşyp, baýlaşdyrylyp dünýä ýaýrandygyna şaýatlyk edýär.
ORIENT news
