Türkmen wekiliýeti GDA döwletleriniň içeri işler ministrleriniň maslahatyna gatnaşdy
15-nji sentýabrda türkmen wekiliýeti Gazagystanyň Türkestan şäherinde Garaşsyz Döwletleriň Arkalaşygyna agza döwletleriň içeri işler ministrleriniň Geňeşiniň mejlisine gatnaşdy. Oňa degişli döwletleriň içeri işler edaralarynyň ýolbaşçylarydyr wekilleri hem-de Arkalaşygyň degişli düzümleriniň wekilleri gatnaşdylar diýip, Gazagystanyň Içeri işler ministrligi habar berýär.
Mejlisde jenaýatçylyga garşy göreşmekde halkara hyzmatdaşlygyny ösdürmek meseleleri ara alnyp maslahatlaşyldy. Ykdysadyýetiň globallaşmagy, maglumat tehnologiýalarynyň çalt depginde ösmegi bilen bagly guramaçylykly jenaýatyň içerki howpsuzlyk üçin howp bolup biljekdigi bellendi. Neşe serişdeleriniň bikanun dolanyşygyna garşy göreşmek meselelerine hem giň orun berildi. Mejlisde ýurtlaryň içeri işler edaralarynyň jenaýaty agtarmak işindäki tejribelerinden mysallar getirildi. Internet ulgamynda kiber jenaýatlaryny ýüze çykarmak boýunça belarus tarapynyň toplan tejribesi we bu babatdaky usuly maslahatlary gatnaşyjylara hödürlendi.
Mejlisiň jemleri boýunça 2024 - 2028-nji ýyllarda GDA agza ýurtlaryň çäklerinde ýol hereketiniň howpsuzlygyny ýokarlandyrmak boýunça geçirilmeli çäreleriň meýilnamasyna gol çekildi. Mejlisiň çäklerinde oňa gatnaşyjylar Gazagystanyň Türkestan sebitiniň polisiýa edarasynyň enjamlaýyn üpjünçiligi, jemgyýetçilik abadançylygyny üpjün etmekde, raýatlaryň hukuklaryny goramakda toplanan tejribeler giňden tanyşdylar.
ORIENT news
