Dubaý şäherinde geçiljek Howanyň üýtgemegi boýunça sammite Türkmenistanyň taýýarlygyna seredildi
30-njy noýabr – 12-nji dekabr aralygynda Birleşen Arap Emirlikleriniň Dubaý şäherinde BMG-niň Howanyň üýtgemegi boýunça Çarçuwaly konwensiýasyna gatnaşyjy taraplaryň 28-nji maslahaty (COP28) geçiriler. Oňa Türkmenistanyň taýýarlyk meseleleri BMG-niň Ösüş maksatnamasynyň we Beýik Britaniýanyň ýurdumyzdaky ilçihanasynyň bilelikde guramagynda geçirilen çärede ara alnyp maslahatlaşyldy.
Mejlise Türkmenistanyň Daşary işler ministrliginiň, daşary ýurtlaryň, şol sanda BMG-niň düzümleriniň ýurdumyzdaky wekilhanalarynyň, Halkara hyzmatdaşlyk boýunça German jemgyýetiniň, Merkezi Aziýa sebit ykdysady hyzmatdaşlyk maksatnamasynyň, BAE-niň ilçihanasynyň wekilleri we Durnukly ösüş maksatnamasynyň ýaş ilçileri gatnaşdylar. Onda howanyň üýtgemegi boýunça Türkmenistanyň halkara borçnamalary we bu babatda milli synlary taýýarlamak işleri barada maglumat berildi.
Mejlisde howanyň üýtgemeginiň öňüni almak boýunça görülýän çärelerde Türkmenistana ýardam bermek meselelerine hem giň orun berildi.
ORIENT news
