Wýetnamyň ilçisi Türkmenistanyň DIM-ne ynanç hatlarynyň nusgasyny gowşurdy
Duşenbe güni Türkmenistanyň Daşary işler ministriniň orunbasary Wepa Hajyýew Wýetnam Sosialistik Respublikasynyň Türkmenistanda täze bellenen ilçisi (rezidentsiýasy Moskwada) Dang Min Khoý bilen duşuşyk geçirdi we diplomatdan ynanç hatlarynyň nusgalaryny kabul etdi diýip, türkmen Daşary işler ministrliginiň metbugat gullugy habar berýär.
Wepa Hajyýew ilçini jogapkär wezipä bellenmegi bilen gutlady we türkmen tarapynyň diplomatik missiýasynyň durmuşa geçirilmegine goldaw we ýardam bermäge taýýardygyny belledi.
Soňra taraplar geljegi uly ugurlarda ikitaraplaýyn hyzmatdaşlygy güýçlendirmek meselelerini ara alyp maslahatlaşdylar. Saparlary iň ýokary derejede guramak, şeýle hem Türkmenistan we Wýetnam parlamentlerinde türkmen-wýetnam dostluk toparlarynyň çäginde, şol sanda iki ýurduň parlamentarlarynyň saparlaryny alyş-çalyş etmek bilen parlamentara gatnaşyklary güýçlendirmek mümkinçiligine garadylar.
Diplomatlar halkara guramalarynda, ilkinji nobatda BMG-de iki ýurduň arasyndaky hyzmatdaşlygy mundan beýläk-de ösdürmegiň zerurdygyny bellediler.
ORIENT news
