Türkmen agyr atletikaçylary Saud Arabystanynda geçiriljek dünýä çempionatyna gatnaşarlar
4-nji sentýabrda Er-Riýadda (Saud Arabystany) başlanjak agyr atletika boýunça dünýä çempionatyna türkmen türgenleri hem gatnaşarlar.
Bedenterbiýe we sport baradaky döwlet komitetiniň ORIENT-iň habarçysyna gürrüň berşi ýaly, türkmen wekiliýeti 22 adamdan ybarat bolup, olaryň 15-si türgenlerdir. Türkmenistanyň erkekler toparynda: Seýitjan Mirzaýew (61 kg), Bunyad Raşidow (67 kg), Perhat Bagtyýarow (67 kg), Bektimur Reýimow (73 kg), Gaýgysyz Töräýew (81 kg), Maksat Meredow (81 kg), Şatlyk Şohradow ( 89 kg), Şahzadbek Mätýakubow (96 kg), Dawranbek Hasanbaýew (102 kg), Hojamuhammet Toýçyýew (+109 kg) dagylar çykyş ederler.
Zenanlar kategoriýasynda: Ýulduz Jumabaýewa (49 kg), Kristina Şermetowa (59 kg), Polina Gurýewa (76 kg), Gülnabat Kadyrowa (76 kg), Anamjan Rüstamowa (81 kg) çykyş eder.
Türkmen agyr atletikaçylarynyň arasynda Ýulduz Jumabaýewa Saud Arabystanynyň münberinde ilkinjileriň hatarynda çykyş eder. Onuň çykyşynyň 6-njy sentýabrda bolmagy meýilleşdirilýär.
Türkmenistanyň milli ýygyndysy agyr atletika boýunça geçiriljek bu dünýä çempionatyna Minsk şäherinde taýýarlyk görendigini bellemelidiris. Belarussiýanyň paýtagtyndaky okuw türgenleşigi 9-njy awgustdan 2-nji sentýabr aralygynda dowam etdi.
Er-Riýadda 4-nji sentýabrdan 14-nji sentýabr aralygynda geçiriljek dünýä çempionaty Olimpiýa oýunlarynyň saýlama tapgyrlaryndan biridir. Bu ýaryşlar, ýüzden gowrak ýurtdan alty ýüzden gowrak agyr atletikaçyny ýygnap, onda türgenler 2024-nji ýylda Parižde geçiriljek Olimpiýa oýunlaryna gatnaşyjylary kesgitleýän reýtingde ýer almak üçin bäsleşerler.
ORIENT news
