Aziýa we Ýewropa ýurtlarynyň wekilleri Samarkantda azyk howpsuzlygyny ara alyp maslahatlaşarlar
Aziýa we Ýewropa ýurtlarynyň 30-dan gowragynyň, birnäçe halkara guramalaryň wekilleri 7-8-nji sentýabrda Özbegistanyň Samarkant şäherinde geçiriljek Azyk howpsuzlygy boýunça halkara maslahatyna gatnaşarlar. Onda dünýäde we Merkezi Aziýa sebitinde azyk howpsuzlygynyň ýagdaýy, oba hojalygynyň dürli meseleleri ara alnyp maslahatlaşylar. Ýurtlaryň arasynda ýokary hilli we elýeterli azyk önümlerini daşamakda "ýaşyl" we tiz geçelgeleri döretmek meselesine hem giň orun berler.
Özbegistanyň Hökümeti we BMG-niň Azyk we oba hojalyk guramasy (FAO) tarapyndan guralýan halkara foruma Şanhaý Hyzmatdaşlyk Guramasynyň, Ykdysady Hyzmatdaşlyk Guramasynyň, Bütindünýä Bankynyň, Yslam azyk howpsuzlygy guramasynyň, Aziýa bankynyň we başga-da birnäçe halkara guramalaryň wekilleri gatnaşarlar.
gazeta.uz neşiriniň mälim etmegine görä, maslahatda oba hojalyk pudagyny ösdürmekde Özbegistanyň ýeten sepgitleri we bu ugurda dünýä tejribesi öwreniler. Özbegistanyň oba hojalyk ministriniň bellemegine görä, howanyň üýtgemegi oba hojalygyna, şol sanda ilaty azyk önümleri bilen üpjün etmek işine özüniň täsirleri ýetirýär. Suw serişdeleriniň azalmagy, ýokary gyzgynlykly howanyň hasyllylyga we maldarçylyga ýetirýän täsiri duýulýar. Azyk üpjünçilik ulgamynda näme garaşýandygyny anyk aýtmak kyn, şonuň üçin-de bu babatda anyk meýilnamalaryň işlenip taýýarlanmagy möhümdir.
FAO-nyň berýän maglumatlaryna görä, häzirki wagtda dünýäde azyk howpsuzlygy ýiti duýulýan çäklerde 2,3 milliard adam ýaşaýar. Şonuň 566 milliony bolsa, Aziýa yklymyna degişlidir.
Halkara maslahatyň çäklerinde "Özbegistanyň oba hojalyk we azyk mümkinçilikleri" atly birinji maýa goýum forumy geçiriler. Foruma Germaniýa, Italiýa, Ysraýyl, Wengriýa, Koreýa, Polşa ýaly döwletlerden 50-den gowrak kompaniýa gatnaşar. Şeýle hem, forumyň çäklerinde oňa gatnaşyjylar Özbegistanyň käbir azyk önümçilik toplumlaryna baryp görerler.
ORIENT news
