Türkmenistanyň Prezidenti Serdar Berdimuhamedow Täjigistan Respublikasynyň Prezidenti Emomali Rahmona gynanç bildirdi
Hormatly Prezidentimiz Serdar Berdimuhamedow Täjigistan Respublikasynyň Prezidenti Emomali Rahmona ýurtda bolup geçen köp sanly adam pidalaryna, şikes ýetmelerine hem-de weýrançylyklara getiren tebigy betbagtçylyk zerarly gynanç hatyny iberdi.
Döwlet Baştutany şu agyr pursatda gurban bolanlaryň dogan-garyndaşlaryna hem- de ýakynlaryna Türkmenistanyň halkynyň we Hökümetiniň adyndan, şeýle hem hut öz adyndan ýürekden gynanjyny we medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdi. Bu barada türkmen döwlet teleradioýaýlymlarynyň habarlar gepleşiginiň agşamky sanynda habar berildi.
Täjigistanda 27-nji awgustda gelen güýçli ýagyn Wahdat şäherinde we Rudaki etrabynda 13 adamyň pida bolmagyna getiren tebigy betbagtçylyklara sebäp boldy - diýip Täjigistan Respublikasynyň Prezidentiniň metbugat gullugy habar berdi.
Ýekşenbe güni ýagan güýçli ýagyş Duşanbe-Hujand ýolunyň aýry-aýry böleklerine-de uly zeper ýetirdi: ol ýerde palçyk akymlary, ýer opmalary we daş ýagmalar hasaba alyndy.
ORIENT news
