Halk Maslahatynyň Başlygy: Wengriýa Türkmenistanyň Ýewropa sebitindäki ygtybarly hyzmatdaşy
"Türkmenistan Wengriýa döwletine Ýewropa sebitindäki möhüm we ygtybarly hyzmatdaşy hökmünde garaýar" - diýip, türkmen halkynyň Milli lideri, Halk Maslahatynyň Başlygy Gurbanguly Berdimuhamedow Wengriýanyň premýer- ministri Wiktor Orbana jogap hatynda ýazýar we baýramçylyk çärelerine gatnaşmak üçin Wengriýa gelmäge çakylygy üçin minnetdarlyk bildirdiýär.
Halk Maslahatynyň Başlygy häzirki döwürde döwletara gatnaşyklaryň işjeň ösýändigini we täze mazmun bilen baýlaşdyrylýandygyny nygtady.
“Siziň şu ýylyň iýun aýynda Türkmenistana amala aşyran saparyňyz hem ikitaraplaýyn gatnaşyklaryň mundan beýläk-de ösmegine itergi beren möhüm tapgyra öwrüldi. Aşgabatda aç-açanlyk we ynanyşmak atmosferasynda geçirilen ýokary derejeli gepleşiklerde, şeýle hem Siziň bilen duşuşyklarda hyzmatdaşlygyň iň möhüm ugurlary boýunça pikir alşyldy. Saparyň netijeleri we gol çekilen resminamalar gatnaşyklarymyzyň mundan beýläk-de ösmegi üçin berk esas bolup hyzmat etdi" - diýip, Prezident Serdar Berdimuhamedowyň şu gün Budapeştde geçirilen duşuşygyň barşynda Wiktor Orbana gowşuran hatynda aýdylýar.
Türkmen halkynyň Milli lideri ýeňil atletika boýunça dünýä çempionatynyň üstünlikli geçirilmegini arzuw etdi we premýer-ministr Wiktor Orbany hem-de Wengriýanyň ähli halkyny esasy döwlet baýramy - Keramatly Stefanyň güni bilen gutlady.
ORIENT news
