Serdar Berdimuhamedow we Wiktor Orban hyzmatdaşlygy giňeltmek meselelerini ara alyp maslahatlaşdylar
Ýekşenbe güni irden iş sapary bilen Budapeşte gelen Türkmenistanyň Prezidenti Serdar Berdimuhamedow Wengriýanyň premýer-ministri Wiktor Orban bilen duşuşdy.
Wengriýanyň Telegraf agentligi MTI, duşuşygyň Wengriýanyň energetika howpsuzlygy meselesinde aýratyn möhümdigini belleýär, sebäbi, geljekde türkmen gazynyň eksporty üçin Wengriýanyň maksatly ýurtlaryň birine öwrülmeginiň esasy elementi bolan Türkmenistan bilen energetika hyzmatdaşlygy barada giňişleýin ylalaşyga gepleşikler alnyp barylýar.
Duşuşykda saglygy goraýyş, derman senagaty, oba hojalygy, azyk senagaty, suw dolandyryşy, şeýle hem bilim we medeniýet ugurlaryndaky hyzmatdaşlygy giňeltmek üçin ikitaraplaýyn gatnaşyklarda entek ulanylmadyk mümkinçilikleriň bardygy aýdyldy.
Türkmenistanyň Prezidenti wenger halkyny milli baýramy - 20-nji awgustda bellenilýän Keramatly Stiwen güni bilen gutlady.
ORIENT news
