Almatyda ilkinji Ýewraziýa film bazary geçiriler
Gazagystanyň Almaty şäherinde GDA ýurtlarynyň (Ermenistan, Azerbaýjan, Belarus, Gazagystan, Gyrgyzystan, Moldowa, Russiýa, Täjigistan, Türkmenistan we Özbegistan) kino pudagyny Ýewropanyň we galan dünýäniňki bilen birleşdirmek maksady bilen täze taslama durmuşa geçirilýär.
Ýewraziýa film bazarynyň (EFM) ilkinji neşiri 11-14-nji sentýabr aralygynda bolar. Bu başlangyç sebitleýin hyzmatdaşlygyň giňelmegine we sebitiň kino pudagy bilen dünýä kino jemgyýetiniň arasynda täze işewür gatnaşyklaryň ýola goýulmagyna itergi berýän her ýyl geçirilýän halkara forumy bolmak üçin döredildi diýip, kino-teatr.ru habar berýär.
Ýewraziýa film bazary diňe bir GDA kino pudagynyň hünärmenlerini bir ýere jemlemän, eýsem sebitde kino işi üçin amatly şertleri döredýän platforma bolup hyzmat etmegi maksat edinýär, şeýle hem GDA ýurtlary bilen dünýä kino jemgyýetiniň arasynda güýçli köpri gurýar.
«Dünýäde bolup geçýän jemgyýetçilik-syýasy wakalary göz öňünde tutup, Merkezi Aziýanyň barha artýan ähmiýetini Gündogar bilen Günbataryň arasyndaky möhüm baglanyşyk hökmünde ykrar edýäris. Häzirki wagtda Merkezi Aziýa ýurtlary abraýly film festiwallaryna çakylyk alýan filmleri öndürýärler we agentler Merkezi Aziýanyň filmlerini halkara programmalaryna goşýarlar. Bilelikdäki önümçilik taslamalaryna bolan islegiň ýokarlanmagy, sebitde ösen film düşüriş infrastrukturasy tarapyndan goldanýar. Şeýle-de bolsa, edilmeli, kämilleşdirilmeli we gazanylmaly işler kän», — diýip EFM-iň esaslandyryjysy we müdiri Helen Haug aýtdy.
Foruma gatnaşyjylara halkara film festiwallarynyň beýleki guramaçylary, prodýuserler we önümçilik kompaniýalary, paýlaýyş kompaniýalary, satuw agentleri, kino zynjyrlary, akym platformalary, şeýle hem öz ýurdunyň kino pudagyny ösdürýän daşary ýurt guramalary we önümçiligini we sebitde filmleriň paýlanmagyny goldaýan daşary ýurt gaznalarynyň wekilleri we mümkin bolan saýlama fond programmalary girer.
Mundan başga-da, Ýewraziýa film bazarynda mazmun paýlanyşy, ekranlaşdyryş tehnologiýalary, şeýle hem filmleri öndürmekde we tanatmakda bilelikde önümçilik mümkinçilikleri barada çekişmeler geçiriler. Merkezi Aziýa ýurtlaryndan dürli žanrly täze filmleri öz içine aljak #GÖZLEG maksatnamasynyň tanyşdyrylyş dabarasy bolar.
2022-2023-nji ýyllaryň doly göwrümli çeper we dokumental filmleri üçin ýüztutmalar 31-nji awgusta çenli açykdyr. Şondan soň halkara distribýutorlar, satuw agentleri, akym platformalary ýa-da film festiwallary hyzmatdaşlyk etmek isleýän taslamalaryny saýlap bilerler.
EFM kino pudagynda işleýän Merkezi Aziýa kompaniýalarynyň senagat katalogyny döredýär. Katalog Ýewraziýa film bazaryna gatnaşyjylaryň hemmesine paýlanar we Toqsan.com bilen hyzmatdaşlykda döredilen ýörite onlaýn platformada, şeýle hem Günorta Koreýadaky Puçhonn halkara fantastiki film festiwalynyň saýtynda ýerleşdiriler.
ORIENT news
