Türkmen ilçisi Ýewropa Komissiýasynyň prezidenti Ursula fon der Lýaýene ynanç hatyny gowşurdy
Türkmenistanyň ilçisi Sapar Pälwanow 28-nji iýulda Ýewropa Komissiýasynyň prezidenti Ursula fon der Lýaýene ynanç hatyny gowşurdy. Söhbetdeşlikde ilçi Türkmenistanyň mümkin bolan ähli ugurlarda ikitaraplaýyn hyzmatdaşlygyň mehanizmlerini has-da pugtalandyrmak borjuny tassyklady.
Şeýle hem, türkmen diplomaty gatnaşyklary ýokary derejede saklamagyň zerurdygyny aýdyp, türkmen tarapynyň şu ýylyň ahyryna çenli ÝB institutlarynyň ýolbaşçylary bilen duşuşmak üçin Türkmenistanyň Prezidentiniň Brýussele saparyny guramak niýetini belläp geçdi. Hanym fon der Lýaýen, türkmen döwletiniň Baştutany bilen duşuşmakdan hoşal boljakdygyny belläp, toparynyň bu meselede türkmen tarapy bilen bilelikde işleşmäge taýýardygyny tassyklady.
Türkmeniň Brýusseldäki ilçihanasynyň habaryna görä, duşuşykda taraplar energetika pudagynda hyzmatdaşlygyň çuňlaşdyrylmagy barada-da pikir alyşdylar. Ýewropa Komissiýasynyň prezidenti Türkmenistan hökümetiniň energetika pudagyndaky hyzmatdaşlygy giňeltmäge taýýardygyny oňlap, ÝB üçin bu ileri tutulýan ugurda geljekdäki hyzmatdaşlygy mundan beýläk-de güýçlendirmek mümkinçiligine ünsi çekdi.
Ilçi bu ugurda öňegidişligiň bardygyny we türkmen tarapynyň Ýewropa Komissiýasynyň Energetika boýunça Baş müdirligi bilen ýakyn wagtda Brýusselde gepleşik geçirmegi meýilleşdirýändigini tassyklady.
Duşuşygyň ahyrynda iki tarap hem Türkmenistan bilen ÝB arasyndaky gatnaşyklary pugtalandyrmaga we öndürijiligini ýokarlandyrmaga ygrarlydyklaryny mälim etdiler.
ORIENT news
