Türkmenistan GDA-da syýahatçylyk ulgamynda hyzmatdaşlygy ösdürmegiň meselelerini ara alyp maslahatlaşdy
Türkmenistanyň wekilleri GDA agza-döwletlerden beýleki delegatlar bilen bir hatarda syýahatçylykda hyzmatdaşlygy ösdürmegiň Strategiýasyny ýerine ýetirmek boýunça 2024-2026-njy ýyllar üçin çäreleriň Meýilnamasynyň taslamasyny gutarnykly işlemek we ylalaşmak boýunça bilermen toparynyň mejlisine gatnaşdylar. Bu barada Arkalaşygyň Ýerine ýetiriji komiteti habar berýär.
Duşuşyk gibrid görnüşinde geçdi. Gatnaşyjylar degişli meýilnamanyň taslamasyny gutarnykly işlediler we ylalaşdylar. Indi ol GDA-nyň daşary işler ministrleriniň Geňeşiniň garamagyna giriziler.
GDA agza-döwletleriň syýahatçylyk ulgamynda hyzmatdaşlygy ösdürmek strategiýasy 2021-2030-njy ýyllara niýetlenendir. Ol içerki bazarda syýahatçylyk akymyny artdyrmaga we bilelikdäki syýahatçylyk önümini döretmekde tagallalary birleşdirmäge, bu ulgamdan GDA-nyň ähli döwletleriniň alýan girdejilerini ýokarlandyrmaga gönükdirilendir. Resminama şeýle hem ähliumumy gymmatlyklary we medeni dürlüligi saklap galmagy öz öňünde maksat edip goýýar.
ORIENT habarlar
