Ukrainanyň ilçisi Gurbanguly Berdimuhamedow adyndaky haýyr-sahawat gaznasyna hoşallyk hatyny iberdi
Ynsanperwerlik kömegi üçin Ukrainadan hoşallyk haty Gurbanguly Berdimuhamedowyň Howandarlyga mätäç çagalara hemaýat bermek boýunça haýyr-sahawat gaznasyna iberildi. Bu haty gowşurmak üçin ukrain ilçisi Wiktor Maýko gaznanyň ýerleşýän ýeri – Arkadag şäherine geldi.
Şeýle hem, bu çärä wise-premýer, Türkmenistanyň Daşary işler ministri Raşid Meredow, Arkadag şäheriniň häkimi Şamuhammet Durdylyýew, haýyr-sahawat gaznasynyň geňeşiniň agzalary hem gatnaşdy.
Türkmenistan şu ýazda Gurbanguly Berdimuhamedow adyndaky haýyr-sahawat gaznasynyň adyndan Ukrainadaky çagalara ynsanperwerlik kömegini iberdi. Olar dermanlar we lukmançylyk serişdelerinden, dokma önümleri we azyk önümlerinden durýar.
«Ukraina ynsanperwerlik kömegi bermek, halkymyzyň ozaldan gelýän adamkärçilik ýörelgelerine ygrarlylygynyň nyşany bolan dostluk hereketidir», - diýip Raşid Meredow dabarada aýtdy. Ol, gaznadan ynsanperwer kömeginiň ýer titremelerinde ejir çeken çagalar üçin Türkiýä we Owganystana iberilendigini ýatlatdy. «Bu, türkmen halkynyň dostlugynyň, mätäçlere duýgudaşlyk we ýardam bermek ukybynyň aýdyň tassyklamasy», -diýip DIM-niň ýolbaşçysy nygtady.
Ilçi Wiktor Maýko, ukrain halkynyň adyndan berlen ynsanperwer kömegi üçin türkmen halkynyň Milli Lideri Gurbanguly Berdimuhamedowa we Prezidenti Serdar Berdimuhamedowa minnetdarlyk bildirdi.
Diplomat ukrain çagalarynyň we lukmançylyk edaralarynyň ýolbaşçylarynyň, şol sanda Belozerskiý hassahanasy, Kiýewiň «Ohmatdet» çagalar hassahanasynyň adyndan hoşallyk hatlaryny, şeýle hem Ukrainanyň dürli sebitlerinden haýyr- sahawat gaznasyna iberilen suratlary gowşurdy.
Hoşallyk hatlaryny kabul eden çagalar sagldyş-dikeldiş merkeziniň baş direktory Maýa Okuzowa, Gurbanguly Berdimuhamedowyň Howandarlyga mätäç çagalara hemaýat bermek boýunça haýyr-sahawat gaznasynyň muzeýine ýerleşdiriljekdigini aýtdy.
Ukrainanyň ilçisi üçin Arkadag şäherindäki çagalar sagldyş-dikeldiş merkeziniň çägine tanyşdyryş gezelenji guraldy.
ORIENT news
