Türkmenistan Ähliumumy habarlar forumyna gatnaşdy we Asiavision reýtinginde 7-nji ýeri aldy
Türkmenistanyň telewideniýe, radiogepleşikler we kinomatografiýa baradaky Döwlet komitetiniň wekilleri Malaýziýanyň Kuçing şäherinde geçen Ähliumumy habarlar forumyna gatnaşdy- diýip, türkmen maglumatlar merkezi habar berýär.
Forumyň meýdanynda Aziýa-Ýuwaş ummany ýaýlym birleşmesiniň garamagyndaky, her ýylda 15 müň materiala golaý çap edýän Asiavision-iň 10 sany iň işjeň gatnaşyjysy kesgitlendi. Türkmenistan üç ýüze golaý makala ugradyp, abraýly yklymlaýyn reýtingiň 7-nji setirinde ýerleşdi.
Forumyň çäklerinde dünýäniň 30-a golaý döwletiniň öňdebaryjy maglumatlar agentlikleriniň we KHBS-i edaralarynyň wekilleri ýakyn ýyl üçin maglumatlar syýasatynyň ileri tutulýan ugurlaryny, okuwlaryň geçilmegini we hünäri ýokarlandyrmagy, halkara auditoriýasy bilen işleşmek boýunça toparyň döredilmegini, şeýle hem KHBS-niň durnukly ösüşiň Maksatlaryna ýetmekdäki üstünliklerini ara alyp maslahatlaşdylar.
Çäre Aziýa-Ýuwaş ummany ýaýlym birleşmesiniň baş sekretary Ahmet Nadimiň başlyklygynda Ýewropa ýaýlym birleşmesiniň we Afrika ýaýlym birleşmesiniň delegatlarynyň gatnaşmagynda geçdi.
ORIENT habarlar
