Türkmenistan ÝUNESKO-nyň institutlary we torlary bilen aragatnaşygyny giňelder
Türkmenistan ÝUNESKO-nyň birnäçe institutyna we toruna goşular. BMG-niň Bilim, ylym we medeniýet meseleleri boýunça guramasy bilen hyzmatdaşlygy giňeltmek üçin ýurdumyz onuň halkara maksatnamalaryna we ýöriteleşdirilen bölümleriniň işine gatnaşmagyny işjeňleşdirmegi meýilleşdirýär.
Bu mesele boýunça teklipleri wise-premýer, Daşary işler ministri Raşid Meredow anna güni Türkmenistanyň Ministrler Kabinetiniň mejlisinde aýtdy.
Hususan-da, ol Türkmenistanyň Magtymguly adyndaky Ýaşlar guramasyny ÝUNESKO-nyň Global Ýaşlar ulgamyna birikdirmek, türkmen ylmy merkezlerini maddy we maddy däl medeni miras, daşky gurşaw, arheologiýa, taryh, etnografiýa, ýazuw we dil edebiýaty, jemgyýetçilik ylymlary ýaly ugurlary öz içine alýan Merkezi Aziýa barlaglary halkara institutynyň taslamalaryna çekmek barada aýtdy.
Şeýle hem, Türkmenistanyň Bilim ministrligi bilen ÝUNESKO-nyň Bilim ulgamynda maglumat tehnologiýalary institutynyň arasyndaky hyzmatdaşlygyň Ýol kartasyny düzmek teklip edilýär.
Geljek 2024-nji ýylda Aşgabatda Türkmenistanyň ÝUNESKO agzalygynyň 30 ýyllygyna bagyşlanan halkara maslahat geçirmek meýilleşdirilýär.
Ýakyn wagtda göz öňünde tutulýan bilelikdäki taslamalar we çäreler, şol sanda ýubileý maslahaty iýun aýynda ÝUNESKO-nyň Tährandaky Klaster edarasynyň direktory, ÝUNESKO-nyň Türkmenistandaky we Eýrandaky wekili Golda El Huriniň Aşgabada amala aşyran saparynyň dowamynda geçirilen söhbetdeşlikde ara alnyp maslahatlaşyldy.
ORIENT news
