Pariž 12 gatdan ýokary jaý gurmagy gadaganlygyna gaýdyp geldi
Parižde 12 gatdan ýokary, ýagny 37 metrden belent jaý gurmagy gadagan edýän kanun güýje girdi. Fransiýanyň paýtagty pes gatly şäher bolmak hukugy üçin köpden bäri göreşip gelýär we ekologik gurluşyga ýardam bermäge gönükdirilen täze “Şäherleşmäniň ýerli meýilnamasyny” (PLU) kabul etdi – diýip, “euronews” ýazýar.
Ilkinji gezek Parižde 37 metrden beýik jaýlaryň gurulmagyna gadaganlyk halk köpçüliginiň tankyt tolkunyna sebäp bolan beýikligi 209 metr Monparnas diňiniň gurluşygy tamamlanandan soň, ýagny 1977-nji ýylda girizildi. Bu çäklendirme 2010-njy ýyla çenli hereket etdi we ozalky mer Bertrand Delanoe tarapyndan ýatyryldy: şonda şäherde 180 metr beýiklikde edara binalaryny we 50 metrlik ýaşaýyş jaýlaryny gurmaga rugsat berildi.
Häzirki wagtda Pariž 1977-nji ýyla gaýdyp geldi. Gadaganlyk şäher häkimi Anne Hidalgonyň “Ýerli bioklimatik şäher meýilnamasy” diýlip atlandyrylýan kömürturşy gazy azaltmak boýunça maksatnamasynyň çäginde girizildi.
Bu kararyň başga bir sebäbi – paýtagtyň üçünji beýik binasy boljak piramida görnüşindäki “Tour Triangle” diňiniň jedelli gurluşygyndadyr. Onda myhmanhana we ofisler, dükanlar we restoranlar ýerleşer.
Şäher häkimi Hidalgo gadaganlygyň "howanyň gyzgynlygynyň ýokarlanmagyna garamazdan, Pariže ýakyn ýyllarda özüne çekiji we ajaýyp" bolup galmagyna mümkinçilik berýän has giň "bioklimatik" meýilnamanyň bir bölegi bolup durýandygyny aýtdy.
ORIENT news
