Aşgabatda CADAP -yň dolandyryjy toparynyň ikinji mejlisi boldy
Aşgabatda Merkezi Aziýada neşe serişdeleriniň ýaýradylmagynyň öňüni almak boýunça Maksatnamanyň 7-nji tapgyrynyň (CADAP 7) Dolandyryjy toparynyň Ikinji mejlisi geçdi. Bu barada Maksatnamanyň resmi saýtynda habar berilýär.
Duşuşyga gatnaşanlar maksatnamanyň ýedinji tapgyryny ýerine ýetirmegiň çäklerinde gazanylan netijeler bilen tanyşdylar, ösüşe bilermen bahalandyrmasyny berdiler. Olar şeýle hem taslamanyň maksatlaryny durmuşa geçirmek üçin gelejekde geçirilmeli çäreleri kesgitlediler.
Çäre şeýle hem sebitde neşe serişdeleriniň ýaýradylmagynyň öňüni almak babatynda tejribe alyşmak üçin meýdançany üpjün etdi.
CADAP 7 neşe serişdelerine islegi kemeltmek boýunça öz milli meýilnamalaryny pugtalandyrmakda mundan beýläkde kömek bermek we neşe serişdeleri babatynda toplumlaýyn we deňagramlaşdyrylan syýasaty işläp düzmekde hyzmatdaşlyk etmekligi dowam etdirmek boýunça ÝB-niň Merkezi Aziýadan bolan hyzmatdaşlaryň öňünde uzakmöhletleýin borçnamalarynyň üznüksizligini beýan edýär.
CADAP 7-niň ýerine ýetirilmeginiň BMG-nyň 2030-njy ýyla çenli döwür üçin durnukly ösüş babatynda Gün tertibine laýyklykda amala aşyrylýandygyny belläp geçmelidiris.
ORIENT habarlar
