Türkmen alymy tebigy gaz galyndysyndan beton öndürmegiň usulyny oýlap tapdy
Tebigy gaz senagat taýdan işlenilende, ondaky kükürt aýrylyp, soňra sarp edijilere ugradylýar. Ýurdumyzyň iň kuwwatly ýangyç-energetika toplumynda tebigy gazyň senagat taýdan işlenilmegi netijesinde, ondan galýan galyndy bolan kükürdi indi beton öndürmekde hem ulanyp bolar. Bu boýunça degişli usullary tehniki ylymlaryň kandidaty Meretmuhammet Hudaýberdiýew öňe sürýär.
Onuň öňe sürýän ylmy teklipleri nebit we gaz serişdeleri senagat taýdan işlenilende bölünip aýrylýan kükürdi önümçilikde ulanmaga, onda-da häzirki wagtda depginli ösdürilýän gurluşyk pudagynyň bähbidine ulanmaga ýardam eder.
Alymyň öňe sürýän täze önümçilik teklibine görä, kükürt degişli garyndylar goşulan ýörite önümçilik düzüminde goýulýar. Bu düzüm beton garyndysyny garmaga, bişirmäge we degişli göwrümi emele getirmäge ýöriteleşdirilen bolmaly. Kükürt goşulan garyndy ýokary temperaturada gyzdyrylýar. Soňra oňa piroliz serişdeleri goşulyp reaktorda ýokary tizlikde garylýar. Kwars çägesi we çagyl goşulan garyndydan degişli beton göwrümi emele getirilýär. Täze önüm 1 gije-gündizde taýýar bolýar. Täze görnüşli beton adaty alynýan betondan hil babatda birjikde tapawutlanmaýar.
Alymyň bellemegine görä, nebitgaz senagatynyň köp möçberde galýan kükürt galyndysy Türkmenistanyň toprak howa şertlerine çydamly ýol-ulag düzümini emele getirmekde hem peýdalanylyp bilner.
ORIENT news
