“Bolşaýa Aziýa” teleýaýlymynyň millionlarça tomaşaçysy Türkmenistan hakda filmlere tomaşa eder
"Bolşaýa Aziýa" (Uly Aziýa) teleýaýlymy Türkmenistan hakda filmleri görkezer. Millionlarça tomaşaçy Türkmenistanyň baý taryhy, medeniýeti, däp-dessurlary, ägirt uly ykdysady üstünlikleri we syýasy sepgitleri barada gürrüň berýän telewizion žurnallaryna tomaşa edip biler – diýip SNG.FM habar berýär.
Teleýaýlym aýda iki gezek Türkmenistan baradaky 52 minutlyk gepleşikleri ýaýlyma berer. Mediýa taslamasy “Bolşaýa Aziýa” teleýaýlymy bilen Türkmenistanyň Telewideniýe we radiogepleşikler baradaky döwlet komitetiniň arasynda gol çekilen hyzmatdaşlyk hakynda şertnamanyň çäginde ýola goýlar.
“Biziň KHBS-miziň işi gowy maglumatlary bermek, habarlar bilen üpjün etmek we durmuşa, ýaşaýşa bolan gyzyklanmasyny artdyrmak maksady bilen gönüden göni adama gönükdirilendir. Biz, ine, şu ugur boýunça bilelikde işlemek, döretmek barada türkmen kärdeşlerimiz bilen ylalaşyga geldik. Bu taslama Russiýany-da, Türkmenistany hem öz içine alar" – diýip, meşhur teleýaýlymyň baş direktory Aleksandr Lebedew aýtdy.
“Bolşaýa Aziýa” teleýaýlymy – giň tomaşaçylar köpçüligi üçin niýetlenen maglumat ýaýlymydyr. Kanalyň ýaýlyma berýän gepleşikleri dürli žanrlardan ybarat, olar habarlar, aktual söhbetdeşlik, dokumental we çeper filmler, Aziýa ýurtlarynyň we Russiýanyň Aziýa böleginiň sebitleriniň taryhy, medeniýeti, tebigaty we durmuşy baradaky gepleşiklerdir.
ORIENT news
