Moskwada heýkeltaraş Babasary Annamyradowyň ilkinji şahsy sergisi açylar
Türkmenistanyň Halk suratkeşi, heýkeltaraş Babasary Annamyradowyň eserleriniň şahsy sergisi 15-nji iýulda Moskwa şäheriniň Gündogar halklarynyň sungaty döwlet muzeýinde açylar. Moskwaly sungaty söýüjileriň ussat heýkeltaraşyň döredijiligi bilen eýýäm tanyşdygyna seretmezden, türkmen heýkeltaraşynyň elinden çykan ajaýyp eserler Russiýanyň paýtagtynda birinji gezek sergilenýär – diýip, “Kultura.RF” ýazýar.
Babasarynyň eserleriniň köpüsi daşary ýurtlarda, hususy ýygyndylarda we Russiýanyň muzeýlerinde duş gelýär. Moskwa sergisinde bolsa awtoryň öz şahsy ýygyndysyndaky işleri görkeziler.
Gündogar halklarynyň sungaty döwlet muzeýinde ussadyň ýokary hünär derejesi we hünär aýratynlyklary barada düşünje berip biljek 40-dan gowrak heýkel we grafika eserleri sergilener. Taslama Türkmenistanyň ajaýyp monumental eserleri döreden öňdebaryjy heýkeltaraşlarynyň biriniň döredijilik işiniň köpgyraňlylygyny, many- öwüşginini açyp görkezer.
Heýkeltaraş dürli materiallar, ýagny agaç, bürünç, daş bilen işleýär. Onuň eserlerine psihologiýa çuňlugy, henek ýa-da çäklendirilen poeziýa, pelsepewi garaýyş mahsusdyr. Sergide soňky dört onýyllygyň dowamynda ýerine ýetirilen 20 töweregi heýkel görkeziler.
Heýkeltaraşlyk eserleri bilen bir hatarda muzeýde 1990–2022-nji ýyllara degişli bolan 40-a golaý grafiki eser hödürlener, esasan-da galam, pastel, flomaster bilen ýerine ýetirilen portretler görkeziler.
Häzir Babasary Annamyradow 82 ýaşynda. Ol “Türkmenistanyň Halk suratkeşi”, “Türkmenistanyň Döwlet çeperçilik akademiýasynyň hormatly doktory”, “Russiýanyň çeperçilik akademiýasynyň hormatly akademigi” ýaly hormatly atlara mynasyp boldy. Halypa heýkeltaraş ýurdumyzyň Suratkeşler birleşigine 20 ýyla golaý ýolbaşçylyk etdi.
Sergi 27-nji awgusta çenli dowam eder. Gündogar halklarynyň sungaty döwlet muzeýi Moskwa ş, Nikitskiý bulwary, 12A salgyda ýerleşýär.
ORIENT news
