Gazagystanda lukmançylyk syýahatçylygynyň meşhurlygy barha artýar
Gazagystanda lukmançylyk syýahatçylygy ösýär. Iň meşhur ugurlar neýro we kardio hirurgiýa, perinatal lukmançylyk, newrologiýa we stomatologiýa hasaplanýar. Ýylyň başyndan bäri bejergi we anyklaýyş üçin respublika üç müň adam geldi. Ýylyň ahyryna çenli 8 müň töweregi adamyň gelmegine garaşylýar – diýip, “Habar 24” habar berýär.
Ylmy-kardiohirurgiýa merkezi Gazagystanyň lukmançylyk ulgamynda buýsanjy we ýeten belent sepgidi hasaplanýar. Bu ýerde ýürege iň çylşyrymly operasiýalar geçirilýär we oňa dünýäniň dürli künjeklerinden syýahatçylar gelýär. Şeýle proseduralaryň biri – ýüregiň çep garynjygynyň implantasiýasydyr. Garynjygyň emelä çalşylmagy organyň doly işlemegine mümkinçilik döredýär. Galyberse-de, hassalar donor ýüregine garaşmak meselesinden dynýarlar.
Saglygy goraýyş edaralarynda ornaşdyrylan enjamlar her on ýylda bir gezek täzelenýär, bu bolsa şeýle amallary ýokary derejede amala aşyrmaga mümkinçilik berýär. Mundan başga-da, gazak lukmanlary daşary ýurtlardan - Günbatar Ýewropadan, Skandinawiýadan, ABŞ we beýleki ýurtlardan gelýän hünärmenler üçin ussatlyk sapaklaryny berýärler.
Gazagystanda operasiýa etdirmek üçin daşary ýurtlular ýörite lukmançylyk ýolhatlaryny satyn alýarlar. Olara hassahanany we lukmany saýlamak, derňewler boýunça onlaýn maslahat, kabul edişlik we myhmanhanada ýerleşdirmek işleri girýär. Operasiýa çylşyrymly bolmasa, hassany şäheriň gözel ýerleri bilen tanyşdyrmak üçin gezelenje çykarýarlar, onuň ýerli däp-dessurlar bilen tanyşmagyna mümkinçilik döredýärler.
Gazagystana ýokary derejeli lukmançylyk kömegini almak üçin hassalar Özbegistandan, Gyrgyzystandan, Germaniýadan, Türkiýeden we Eýrandan gelýärler. Daşary ýurtly hassalaryň aglaba köpüsi Russiýanyň raýatlarydyr.
ORIENT news
