Türkmen hünärmenleri Ýerewanda maliýe hasabatlaryny düzmek boýunça öňdebaryjy usullary öwrendiler
Türkmenistan bilen Ermenistanyň ykdysadyýet we maliýe pudagyndaky hünärmenleri Ýerewanda tejribe alyşdylar we maliýe hasabatlaryny taýýarlamakda öňdebaryjy tejribäniň mümkinçiliklerini öwrendiler. Iki ýurduň hünärmenleriniň arasyndaky hyzmatdaşlygyň mümkinçiliklerine hem garaldy.
Türkmen wekiliýetiniň düzüminde Ermenistanyň paýtagtyna Türkmenistanyň Maliýe we ykdysadyýet ministrliginiň we Türkmenistanyň Statistika baradaky döwlet komitetiniň wekilleri geldi. Ýerewanly kärdeşleri olary ýurtda ulanylýan statistika usulyýeti we maliýe hasaplaryny düzmegiň gurallary bilen tanyşdyrdylar, şeýle hem usulyýet meseleleriniň ýörelgelerini düşündirdiler. Mundan başga-da, häzirki wagtda Türkmenistanda maliýe hasaplaryny düzmek üçin ulanylýan usullary, şol sanda 2008-nji ýylyň Milli hasap ulgamyna (MHU) geçiş prosesini ara alyp maslahatlaşdylar.
Bu tanyşlyk we tejribe alyşma saparynyň Türkmenistanyň 2008-nji ýylyň MHU-nyň statistik ülňülerine laýyklykda maliýe hasaplaryny işläp düzmek we ýurduň milli hasaplar babatynda institusional we statistiki mümkinçiliklerini güýçlendirmek boýunça alyp barýan işlerine goşant goşmagyna garaşylýar.
Türkmen wekiliýetiniň Ýerewana sapary BMGÖM tarapyndan Türkmenistanyň Statistika baradaky döwlet komiteti bilen bilelikde durmuşa geçirilýän “Türkmenistanyň Statistika baradaky döwlet komitetiniň institusional, statistik, maglumat we tehniki mümkinçiliklerini berkitmek” taslamasynyň çäginde gurnaldy.
ORIENT news
