Serdar Berdimuhamedow sowgat iberilen elektromobiller üçin türk Liderine hoşallyk bildirdi
Prezident Serdar Berdimuhamedow Türkiýäniň Prezidenti Rejep Taýyp Ärdogan bilen geçiren telefon arkaly söhbetdeşliginiň dowamynda özüne we Halk Maslahatynyň Başlygy Gurbanguly Berdimuhamedowa iberilen "TOGG" kysymly elektromobiller üçin hoşallyk bildirdi.
Täze ulaglaryň açarlary Arkadag şäheriniň açylyş dabaralaryna barşynda Prezident Serdar Berdimuhamedowa gowşuryldy. Döwlet Baştutanlarynyň belleýişleri ýaly, täze "TOGG" kysymly elektromobilleriniň öndürilip başlanmagynyň Türkiýe Respublikasynyň ähli ugurlarda ösüşlere beslenýändiginiň subutnamasydyr.
Öz gezeginde Rejep Taýyp Ärdogan Serdar Berdimuhamedowy täze gaýtalanmajak şähergurluşygy bolan Arkadag şäheriniň birinji tapgyrynyň ulanmak berilmegi bilen gutlady. "Smart siti" taslamasy esasynda gurlan şunuň ýaly şäheriň sebitde ýeketäkligi Türkmenistanda alnyp barylýan durmuş ugurly döwlet syýasatynyň üstünliklere beslenýändiginiň nyşanydyr.
Prezident Serdar Berdimuhamedow türkmen-türk gatnaşyklaryny ösdürmäge goşýan şahsy goşandy üçin türk Liderine minnetdarlyk bildirip, özara hyzmatdaşlygy mundan beýläk-de pugtalandyrmagyň Türkmenistanyň ileri tutýan ugurlarynyň biridigini nygtady.
Duşuşygyň barşynda taraplar birek-biregi Gurban baýramy bilen tüýs ýürekden gutladylar.
ORIENT news
