Gurbanguly Berdimuhamedow Mekke şäherinde gurbanlyk sadakasyny berdi
Türkmenistanyň Halk Maslahatynyň Başlygy Gurbanguly Berdimuhamedow Saud Arabystanyna haj saparynyň barşynda Mekke şäherinde gurbanlyk sadakasyny berdi. Bu barada Türkmenistanyň resmi metbugaty habar berýär.
Gurbanlyk sadakasy dünýäniň iň uly metjidi bolan Al-Haram metjidinde berildi. Oňa Saud Arabystanynda bolýan türkmen wekiliýeti we dostlukly döwletiň resmi adamlary gatnaşdylar.
Al-Haram metjidinde türkmen halkynyň Milli Lideri Gurbanguly Berdimuhamedowyň Katar Döwletiniň Emiriniň ýörite wekili Hadi Bin Ali Al-Marri bilen duşuşygy geçirildi. Onuň barşynda taraplar türkmen-katar hyzmatdaşlygyny giňeltmek üçin baý mümkinçilikleriň bardygyny bellediler.
Şeýle hem Patyşa Abdulaziz adyndaky Halkara howa menzilinde Gurbanguly Berdimuhamedowyň Jidda şäheriniň häkimi, şazada Saud bin Jalawi Al Saud we Yslam ösüş bankynyň prezidenti Ahmad Mohamed Ali Al-Madani bilen gepleşikleri geçirildi.
ORIENT news
