Tutuş hepde manežde! Russiýanyň sirk artistleri täze Arkadag şäherinde çykyş ederler
3-nji iýul, duşenbe güni Arkadag şäheriniň Görogly adyndaky Döwlet atçylyk sirkinde Moskwanyň Uly döwlet sirkiniň we Reňkli bulwardaky Moskwa Nikulin sirkiniň artistleriniň çykyşy başlanýar. Çykyşlar tutuş hepdäniň dowamynda, 9-njy iýul, ýekşenbe güni hem dowam eder.
Russiýaly sirk artistleri Arkadag şäheriniň açylmagy mynasybetli muşdaklaryna uly baýramçylyk maksatnamasyny hödürleýärler we hemmeleri öz şüweleňine çagyrýarlar. Rus sirki dünýäniň iň uly sirk mekdepleriniň biridir, onuň, ýaşyna garamazdan, hemmelerde üýtgeşik ýakymly täsirleri galdyrýan öz däp-dessurlary we urp-adatlary bar.
Howa gimnastlary, žonglýorlar, akrobatlar we ekwilibristler özleriniň ussatlyklaryny we ajaýyp başarnyklaryny görkezerler. Şeýle hem tomaşaçylar tälim berlen gaplaňlaryň, ýolbarslaryň, aýylaryň ýerine ýetirýän tilsimlerinden, ukyp-başarnyklaryndan lezzet alarlar. Elbetde, şadyýan we gülkünç masgarabazlaryň hem ýörite taýýarlan çykyşlary bolar.
Arkadag şäheriniň täze sirkine Aşgabatdan hususy awtoulaglar, taksi we 45 belgili awtobus bilen barmak bolar.
Biletleri 30-njy iýundan Arkadag şäheriniň Görogly adyndaky Döwlet atçylyk sirkiniň we Aşgabatdaky Türkmenistanyň döwlet sirkiniň kassalaryndan satyn alyp bilersiňiz. Kassalar sagat 10:00-dan 19:00-a çenli işleýär.
Habarlaşmak üçin telefonlar: (+99312) 361034, 361095 we +99365218320.
ORIENT news
