Arkadag şäheriniň häkimi maýa goýujylary innowasiýa taslamalaryna gatnaşmaga çagyrdy
Arkadag şäheriniň häkimi Şamuhammet Durdylyýew halkara maýa goýum forumynda çykyş edip, maýa goýujylary ýurdumyzyň milli ähmiýetli ilkinji şäheriniň innowasiýa taslamalaryna gatnaşmaga çagyrdy.
Durdylyýew foruma gatnaşyjylara Arkadag şäherindäki täze maýa goýum mümkinçilikleri barada gürrüň berdi. Innowasiýa, ulag we logistika, ýaşaýyş jaý gurluşygy ýaly ugurlarda hyzmatdaşlygy ösdürmegiň mümkinçiliklerini görkezip, häkim ähli gyzyklanýan taraplary işjeň hyzmatdaşlyga çagyrdy.
Häkim, Arkadag şäheriniň gurluşygynyň birinji tapgyrynyň çäginde 10 müň orunlyk stadion, döwlet drama teatry, myhmanhana, atçylyk sirki, ýöriteleşdirilen mekdepler, atçylyk sport akademiýasy, çagalar sagaldyş-dikeldiş merkezi we ş.m. ýaly 300-den gowrak desganyň gurlandygyny belledi.
Düýn, 29-njy iýunda açylan täze binalaryň arasynda 2, 5, 7 we 9 gatly 258 ýaşaýyş jaýy bar. Olarda 40,5 müňden gowrak adam ýaşar.
Ýaşaýyş jaýlary käbir enjamlaryň işleýşini awtomatlaşdyrýan we internet arkaly uzakdan dolandyrylmagyna we howa derejesi we çyglylygy ýaly dürli görkezijilere gözegçilik etmäge mümkinçilik berýän «akylly öý» ulgamlary bilen enjamlaşdyrylandyr.
«Akylly» şäheriň durmuş infrastrukturasynyň iň möhüm bölegi – Gurbanguly Berdimuhamedow adyndaky çagalar sagaldyş-dikeldiş merkezi, 350 orunlyk köpugurly hassahana, 150 orunlyk onkologiýa merkezi, 150 orunlyk Enäniň we çaganyň saglygyny goräýyş merkezi, tiz kömek merkezi we saglyk öýidir.
Ýurdumyzyň ilkinji «akylly» şäherinde, eýýäm gurluşygyň birinji tapgyrynyň çäginde hersi 320 orunlyk 10 sany mekdebe çenli bilim edarasy, hersi 720 orunlyk daşary ýurt dillerine ýöriteleşdirilen 2, 3, 4-nji mekdepler, şeýle hem lukmançylyk we mugallymçylyk orta hünärment mekdepleri guruldy.
ORIENT news
