Türkmenistanly talyplar "Talyp başlangyjy" grant bäsleşigine gatnaşýarlar
GDA ýurtlarynyň talyplary ýaş telekeçileriň “Student Startup” bäsleşiginde ýeňiş gazanyp, öz taslamalaryny durmuşa geçirmek üçin Russiýada grant alarlar. Bäsleşik Russiýanyň "Uniwersitet tehnologiki telekeçilik platformasy" federal taslamasynyň çäginde innowasiýalara ýardam gaznasy tarapyndan geçirilýär.
Bu ýyl bäsleşige Belarusyň, Gazagystanyň, Gyrgyzystanyň, Täjigistanyň, Özbegistanyň we Türkmenistanyň ýaşlary gatnaşýar. Geçen hepdede bäsleşigiň dördünji, jemleýji tapgyryna gatnaşmak üçin arzalaryň kabul edişligi tamamlandy – diýip, Russiýanyň ýardam gaznasynyň metbugat gullugy habar berýär.
2022-nji ýylda müň ýeňiji kesgitlendi, olaryň her biri 1 million rubl möçberinde grant aldy. 2023-nji ýylda şolar ýaly maliýeleşdirme 1500 talyp başlangyjyna bölünip berler. Arzalar gözden geçirilenden soň, bäsleşige gatnaşyjylar öz taslamalaryny gorarlar we awgust aýynda ýeňijiler yglan ediler.
Bäsleşige gatnaşýanlaryň taslamalary sanly tehnologiýalardan döredijilik pudaklaryna çenli alty tematiki ugry öz içine alýar. Olaryň köpüsi sanlylaşdyrma, onlaýn platformalary we ykjam programmalary döretmäge bagyşlanýar.
Şeýle-de, senagat üçin täze enjamlary we ulgamlary işläp taýýarlamaga gönükdirilen taslamalar bar, döredijilik pudagyndaky başlangyçlar bolsa täze egin- eşik markasyny we göçme ses ulgamyny döretmegi öz içine alýar.
ORIENT news
