Meşhur aýdymçy we sazanda Jeffri Stil Aşgabatda çykyş eder
Sazyň kantri görnüşi boýunça meşhurlyk gazanan amerikaly ýerine ýetiriji Jeffri Stil Aşgabatda çykyş eder. Kaliforniýaly meşhur aýdymçy 6-8-nji iýul aralygynda türkmen paýtagtyna döredijilik sapary bilen geler – diýip, ABŞ-nyň Türkmenistandaky diplomatik wekilhanasy habar berýär.
Ol 8-nji iýulda Mukamlar köşgünde konsert bilen çykyş eder. Çäre 19:00-da başlanýar. Amerikan merkezinde meýilleşdirilen söhbetdeşligiň barşynda amerikan kantri aýdym-saz görnüşiniň ýyldyzy bilen ýakyndan tanyşmak üçin, öňünden şu salgyda ýazylmak bolar.
Jeffri Stiliň aýdymlary daşary ýurtlarda giňden tanalýar: ol Amerikanyň tutuş kantri saz medeniýetiniň parlak ýyldyzy hasaplanýar. Sazandanyň köpsanly baýraklary muňa güwä geçýär. Şolaryň arasynda Stile 1996-njy, 2006-njy we 2014-nji ýyllarda "Iň gowy instrumental kantri ýerine ýetiriliş" we "Kantri stilinde iň gowy aýdym" ýaly nominasiýalarda gowşurylan 3 sany “Grammi” baýragy bar.
Amerikanyň Birleşen Ştatlarynyň ýazylmadyk nyşany bolan kantri aýdym-sazy, gürrüňsiz, Amerikanyň medeni mirasynyň bir bölegi hasaplanýar. Häzirki wagtda uly meşhurlyga eýe bolan amerikan aýdymçylarynyň kantri-albomlary dürli döwürlerde iň köp diňlenilýän aýdymlaryň sanawyny düzdi. Teýlor Swift, Şanaýýa Tweýn, Marl Haggard we beýlekiler sazyň bu ugrunyň görnükli wekilleri hasaplanýar.
ORIENT news
