Türkmenistanlylar «Arkalaşygyň çagalary» halkara forumyna gatnaşýarlar
Türkmenistan Daşkent welaýatynyň «Semurg» sagaldyş lagerinde geçýän «Arkalaşygyň çagalary» atly sekizinji medeni-bilim forumyna wekilçilik edýär.
GDA-nyň Parlamentara Assambleýasynyň goldaw bermeginde gurnalan forum bu ýyl «Arkalaşygyň çagalary: wagtlaryň we nesilleriň aýrylmaz arabaglanyşygy» şygary astynda geçýär. Oňa şeýle hem Ermenistandan, Belorusda, Gazagystandan, Gyrgyzstandan, Russiýadan, Täjigistandan we Özbegistandan 14-17 ýaşlaryndaky 800-e golaý mekdep okuwçylary gatnaşýarlar.
Onuň maksady — çagalary we ýaşlary hoşniýetli goňşyçylyk we hyzmatdaşlyk ruhunda terbiýelemek üçin meýdançany bermekdir.
«Bu ýyl forumyň şygarynyň – «Wagtlaryň we nesilleriň aýrylmaz arabaglanyşygy» bolmagy ýöne ýerden däldir. Sebäbi hut şeýle ýaşlar öz deň-duşlaryny birleşdirýär, biziň ylmymyzyň umydy bolup durýar, bilim we gowy zatlar baradaky pikiri özünde göterýär. Oňa beýik gelejek degişlidir» – diýip, gatnaşyjylary garşylamak bilen, Oliý Mažlisiň Senatynyň başlygy Tanzila Narbaýewa aýtdy.
Özbegistanyň Milli maglumatlar agentliginiň habar bermegine görä, forumyň her güni aýratyn bir ýurduň taryhyna we medeniýetine bagyşlanar. Çagalar üçin sport ýaryşlary, döredijilik seminarlary, kwestler, saz çäreleri gurnalar.
Gatnaşyjylar Özbegistanyň Oliý Mažilisiniň Senatynda bolup gördüler, Senatyň işjeňligi, onuň düzümi we senatorlar bilen tanyşdylar. Olaryň şeýle hem respublikanyň Ýaşlar parlamentiniň agzalary bilen aragatnaşyga girmäge mümkinçiligi boldy.
«Arkalaşygyň çagalary» halkara forumy dowam edýär.
ORIENT habarlar
