Türkmenistan we Litwa ulag, energetika, işewürlik ugurlaryndaky gatnaşyklary işjeňleşdirmäge taýýar
Anna güni Aşgabatda türkmen-litwa DIM-ara geňeşmeleri geçirildi. Iki ýurduň wekiliýetlerine wise-ministrler Wepa Hajiýew we Mantas Adomenas ýolbaşçylyk etdi.
Diplomatlar iki ýurduň arasyndaky hyzmatdaşlygyň häzirki ýagdaýyny seljerip, ulag we logistika infrastrukturasy, energetika, daşky gurşaw meseleleri ýaly ugurlarda hyzmatdaşlygy güýçlendirmäge taýýardyklaryny mälim etdiler.
“Ikitaraplaýyn gatnaşyklaryň möhüm tarapy parlamentara hyzmatdaşlygy ösdürmek bolup durýar we bu meselede ähmiýetli orun Türkmenistanyň Mejlisinde hereket edýän Litwa Respublikasynyň Parlamenti bilen Dostluk toparyna degişlidir. Şu nukdaýnazardan Wepa Hajiýew iki döwletiň mejlisiniň agzalarynyň özara saparlaryny guramagyň mümkinçiligine garamagy teklip etdi" –diýlip, türkmen DIM-niň metbugat beýanatynda aýdylýar.
Taraplaryň pikirine görä, Türkmenistan we Litwa söwda-ykdysady ugurda hyzmatdaşlygy giňeltmek üçin oňyn mümkinçiliklere eýe. Bu ugurdaky gatnaşyklary güýçlenmek üçin iki ýurduň işewür toparlarynyň arasynda netijeli aragatnaşyk gurmagyň geljegi barada hem bellenildi.
ORIENT news
